மணமேல்குடி அரசு மருத்துவமனையில் தொடரும் உயிரிழப்புகள்: SDPI கட்சி கடும் கண்டனம்!

மணமேல்குடி அரசு மருத்துவமனையில் நிலவும் மருத்துவர் பற்றாக்குறை மற்றும் அலட்சியப் போக்கினால் உயிரிழப்புகள் தொடர்வதைக் கண்டித்தும், போதிய மருத்துவ வசதிகளை ஏற்படுத்தக் கோரியும் SDPI கட்சி சார்பில் தமிழக அரசுக்குக் கடும் கண்டனம் தெரிவிக்கப்பட்டுள்ளது.

தொடரும் துயரம்: சிகிச்சை இன்றி பறிபோகும் உயிர்கள்

புதுக்கோட்டை மாவட்டம், மணமேல்குடி அரசு மருத்துவமனையைச் சுற்றியுள்ள கிராம மக்கள் அவசர சிகிச்சைக்கு இந்த மருத்துவமனையையே பெரிதும் நம்பியுள்ளனர். ஆனால், இங்கு போதிய மருத்துவர்கள் மற்றும் ஊழியர்கள் இல்லாததால் சிகிச்சைக்காக வரும் ஏழை மக்கள் கடும் அவதிக்குள்ளாகி வருகின்றனர்.

*சில மாதங்களுக்கு முன்பு, அம்மாபட்டினத்தைச் சேர்ந்த சிறுவன் ஒருவன் பாம்பு கடித்த நிலையில் கொண்டு வரப்பட்டபோது, மருத்துவர் மற்றும் மருந்து இல்லாத காரணத்தால் உயிரிழந்தார்.

*அதைத் தொடர்ந்து, மின்சாரம் தாக்கிப் பாதிக்கப்பட்ட வாலிபர் ஒருவரும் செவிலியர்களின் அலட்சியம் மற்றும் மருத்துவர் இல்லாத காரணத்தால் உயிரிழந்ததாகக் கூறப்படுகிறது.

வாக்குறுதிகள் மீறப்பட்டதாகக் குற்றச்சாட்டு

இந்த அவல நிலையைக் கண்டித்து SDPI கட்சி சார்பில் ஏற்கனவே "மருத்துவமனையை இழுத்து மூடும் போராட்டம்" அறிவிக்கப்பட்டது. அப்போது வட்டாட்சியர் தலைமையில் நடைபெற்ற பேச்சுவார்த்தையில், மூன்று மாதங்களுக்குள் கோரிக்கைகள் நிறைவேற்றப்படும் என உறுதி அளிக்கப்பட்டது. மேலும், அறந்தாங்கி சட்டமன்ற உறுப்பினர் திரு. ST.ராமச்சந்திரன் அவர்கள் நேரில் ஆய்வு செய்து வசதிகளை மேம்படுத்துவதாக உறுதியளித்தார். ஆனால், இதுவரை எந்த ஒரு ஆக்கப்பூர்வமான நடவடிக்கையும் எடுக்கப்படவில்லை.

மீண்டும் ஒரு விபத்து: நள்ளிரவில் நேர்ந்த அவதி

நேற்று முன்தினம் (16.12.2025) இரவு அம்மாபட்டினத்தில் இரு கனரக வாகனங்கள் மோதி விபத்து ஏற்பட்டது. இதில் காயமடைந்தவரை SDPI கட்சியின் அம்மாபட்டின கிராம பஞ்சாயத்து தலைவர் மஸ்தான் கனி மற்றும் நிர்வாகிகள் உடனடியாக மணமேல்குடி அரசு மருத்துவமனைக்கு அழைத்துச் சென்றனர். ஆனால், வழக்கம்போல் அங்கும் மருத்துவர் இல்லாததால் காயமடைந்தவருக்குச் சிகிச்சை அளிக்க முடியாமல் மக்கள் பெரும் போராட்டத்தை எதிர்கொண்டனர்.

SDPI கட்சியின் கோரிக்கை

இது குறித்து புதுக்கோட்டை கிழக்கு மாவட்ட SDPI கட்சியின் மாவட்ட பொதுச் செயலாளர் M. முகமது அஜீஸ் விடுத்துள்ள அறிக்கையில் கூறியிருப்பதாவது:

 "அரசின் அலட்சியப் போக்கால் மணமேல்குடி பகுதியில் ஏழை மக்களின் உயிர்கள் தொடர்ந்து பறிபோவது மிகுந்த வேதனையளிக்கிறது. தமிழக அரசு உடனடியாக தலையிட்டு, மணமேல்குடி அரசு மருத்துவமனையில் போதிய மருத்துவர்களை நியமிப்பதோடு, விஷமுறிவு மருந்து உள்ளிட்ட அத்தியாவசிய மருத்துவ வசதிகளைப் போர்க்கால அடிப்படையில் ஏற்படுத்த வேண்டும். மக்களின் உயிரோடு விளையாடும் போக்கை அரசு கைவிட வேண்டும்."

இங்ஙனம்,

M.முகமது அஜீஸ்

மாவட்ட பொதுச் செயலாளர்,

SDPI கட்சி, புதுக்கோட்டை கிழக்கு மாவட்டம்.

எங்களுடைய இணையதள செய்திகளை உடனுக்குடன் தெரிந்து கொள்ள எங்களுடைய சமூக இணையப்பக்கத்தை Like, Follow, Joint மற்றும் Subscribe செய்து கொள்ளுங்கள்...

Facebook: https://www.facebook.com/GpmMedia/

Twitter: https://twitter.com/GpmMedia

Instagram: https://www.instagram.com/gpmmedia/

Youtube: https://www.youtube.com/c/GpmMedia

புதுக்கோட்டை மாவட்ட செய்திகளை வாட்ஸ் அப்பில் தெரிந்து கொள்ள எங்களது GPM மீடியா குழுமத்தில் இணைந்து கொள்ளுங்கள்... (கிளிக்) 

புதுக்கோட்டை மாவட்ட செய்திகளை டெலி கிராமில் தெரிந்து கொள்ள எங்களது GPM மீடியா குழுமத்தில் இணைந்து கொள்ளுங்கள்..(கிளிக்)