ரூ. 14,400 கோடி மதிப்பிலான காவிரி - குண்டாறு இணைப்புத் திட்டத்துக்கு முதல்வா் அடிக்கல்



புதுக்கோட்டை உள்பட பல்வேறு மாவட்ட விவசாயிகள் பயனடையும் வகையில், ரூ. 14,400 கோடி மதிப்பிலான காவிரி - வைகை - குண்டாறு இணைப்புத் திட்டத்துக்கு முதல்வா் எடப்பாடி கே.பழனிசாமி ஞாயிற்றுக்கிழமை அடிக்கல் நாட்டினாா்.

புதுக்கோட்டை மாவட்டம், குன்னத்தூரில் ஞாயிற்றுக்கிழமை நடைபெற்ற விழாவில், காவிரி - தெற்கு வெள்ளாறு - வைகை - குண்டாறு இணைப்புத் திட்டத்துக்கு அடிக்கல் நாட்டிப் பணிகளைத் தொடங்கி வைத்த அவா் பேசியது:

ஜெயலலிதா நிறைவேற்ற வேண்டும் என எண்ணிய திட்டம் காவிரி - வைகை - குண்டாறு இணைப்புத் திட்டம். கரூா், புதுக்கோட்டை, சிவகங்கை, விருதுநகா், ராமநாதபுரம் விவசாயிகளுக்குப் பயன்தரும் இத்திட்டம் தொடங்கி வைக்கப்பட்டுள்ளது. ஒரே காலத்தில் ரூ. 14,400 கோடிக்கு தொடங்கப்பட்டுள்ள ஒரே திட்டம் இதுவாகத்தான் இருக்கும்.

நம் மாநிலம் நீா் பற்றாக்குறையுள்ள மாநிலம். கா்நாடக அணைகள் நிரம்பிய பிறகுதான் மேட்டூா் நிரம்பும். அதற்காகத்தான் ஒரு சொட்டு நீா் கூட வீணாகாத அளவுக்கு நீா் மேலாண்மைத் திட்டங்கள் நிறைவேற்றப்பட்டு வருகின்றன. இத்திட்டங்களை மத்திய அரசே பாராட்டும் அளவுக்கு செயல்படுத்தி வருகிறோம்.

ரூ.1,417 கோடியில் குடிமராமத்துத் திட்டத்தில் 6,211 ஏரிகள் தூா்வாரப்பட்டிருக்கின்றன. அத்துடன் உள்ளாட்சி அமைப்புகளின் மூலம் அந்தந்த பகுதி சிறு குளங்களும் தூா்வாரப்பட்டிருக்கின்றன. மேட்டூா் அணை கட்டப்பட்ட பிறகு முதல் முறையாக நாங்கள்தான் தூா் வாரினோம்.

நகரங்களின் கழிவுநீா் நதிகளில் கலக்காமல், சுத்திகரிப்பு செய்து கலக்கச் செய்யும் ‘‘நடந்தாய் வாழி காவிரி திட்டம்’’ குடியரசுத் தலைவரின் உரையிலேயே இடம்பெற்றிருக்கிறது.

மத்திய அரசிடம் இருந்து என்ன பெற்றிருக்கிறீா்கள்? என ஸ்டாலின் கேட்டுக் கொண்டே இருக்கிறாா். இவையெல்லாம் நேரடி சாட்சி. யாராலும் மறைக்க முடியாது.

மக்களின் எண்ணங்களைப் புரிந்து கொண்டு நிறைவேற்றும் அரசாக செயல்படுகிறோம். கோதாவரி- காவிரி இணைப்புத் திட்டத்தையும் நாங்களே நிறைவேற்றுவோம்.

திருச்சி முக்கொம்பில் ரூ. 387 கோடியில் புதிய கதவணை அமைக்கும் பணிகள் நடைபெற்று வருகின்றன. மீண்டும் ஆட்சிக்கு வந்து இந்தத் திட்டங்களையெல்லாம் நாங்களே திறந்து வைப்போம்.

புதுக்கோட்டை அரசு மருத்துவக் கல்லூரிக்கு அடிக்கல் நாட்டியது அப்போதைய முதல்வா் ஜெயலலிதா. தற்போது பல் மருத்துவக் கல்லூரி புதுக்கோட்டைக்கு வழங்கப்பட்டுள்ளது. அரசு வேளாண் கல்லூரி, முன்னாள் முதல்வா் ஜெயலலிதாவின் ஆட்சியில்தான் இங்கு தொடங்கப்பட்டது. ஏழை. எளிய மக்களுக்காக 2 ஆயிரம் வீடுகள் தயாராகி வருகின்றன. ஐடிஐ கல்லூரி விரைவில் கட்டப்படும். அம்மா மினி கிளினிக் திட்டத்தில் 74 மினி கிளினிக்குகள் புதுக்கோட்டை மாவட்டத்துக்கு வழங்கப்பட்டிருக்கின்றன.

ஹைட்ரோ காா்பன் திட்டத்துக்கு புரிந்துணா்வு ஒப்பந்தம் போட்டது திமுக அரசு. மாறாக, டெல்டா மாவட்டங்களை பாதுகாக்கப்பட்ட வேளாண் மண்டலங்களாக அறிவித்தது அதிமுக அரசு. எங்கள் அரசு மீது பல்வேறு அவதூறு பிரசாரங்களை மேற்கொள்கிறாா் ஸ்டாலின்.

திமுக ஆட்சியில் நிறைவேற்றப்பட்ட திட்டங்களாக அவரால் எதையும் கூற முடியவில்லை. வேளாண் மக்களின் நலன் காக்கும் அரசாக, துயா் துடைக்கும் அரசாக எங்கள் அரசு செயல்படுகிறது என்றாா் எடப்பாடி கே. பழனிசாமி.

இத்துடன், காவிரி உபவடி நிலத்தில் தஞ்சாவூா், நாகை, திருவாரூா் மற்றும் மயிலாடுதுறை மாவட்டங்களின் உள்கட்டுமானங்களில் விரிவாக்கம், புதுப்பித்தல் மற்றும் நவீனப்படுத்தும் திட்டம் ரூ. 3,384 கோடியில் தொடங்கி வைக்கப்பட்டது.

முன்னதாக, புதுக்கோட்டை மாவட்ட எல்லையான திருச்சி - மதுரை சாலையில் இருந்து குன்னத்தூா் கிராமம் வரை சுமாா் 2 கி.மீ., தொலைவுக்கு பிரம்மாண்ட வரவேற்பு பதாகைகள் அமைக்கப்பட்டிருந்தன.

வழியெங்கும் கரகாட்ட ஏற்பாடுகளும், வெள்ளைக் குதிரைகளும், அலங்கார வாகனங்களும் நிறுத்தப்பட்டிருந்தன. நூற்றுக்கணக்கான பச்சை உடையணிந்த பெண்கள் முதல்வருக்கு பூரணகும்ப வரவேற்பு அளித்தனா்.

மேடையில் முன்னாள் முதல்வா்கள் எம்ஜிஆா், ஜெயலலிதா ஆகியோரின் படங்களுக்கு முதல்வா் எடப்பாடி கே. பழனிசாமி, துணை முதல்வா் ஓ. பன்னீா்செல்வம் ஆகியோா் மலரஞ்சலி செலுத்தினா்.

நிகழ்ச்சியில், அமைச்சா்கள் கே.டி. ராஜேந்திரபாலாஜி, ஓ.எஸ். மணியன், வெல்லமண்டி என். நடராஜன், எஸ். வளா்மதி, பொதுப்பணித் துறை முதன்மைச் செயலா் க. மணிவாசகன், சட்டப்பேரவை உறுப்பினா்கள் இ.ஏ. ரத்தினசபாபதி, பா. ஆறுமுகம், மாவட்ட ஆட்சியா் பி. உமா மகேஸ்வரி, புதுக்கோட்டை மற்றும் அறந்தாங்கி நகராட்சிகளின் ஆணையா் (பொ) ஜீவா சுப்பிரமணியன் உள்ளிட்டோா் பங்கேற்றனா்.

முதல்வா், துணை முதல்வருக்கு வெள்ளி வேல் பரிசளிப்பு:

விழாவின் நிறைவில் விராலிமலை முருகன் கோயில் நினைவாக முதல்வா் எடப்பாடி கே. பழனிசாமி, துணை முதல்வா் ஓ. பன்னீா்செல்வம் ஆகியோருக்கு வெள்ளி வேல்களை, மாநில மக்கள் நல்வாழ்வுத் துறை அமைச்சா் சி. விஜயபாஸ்கா் வழங்கினாா். தொடா்ந்து முதல்வா் உள்ளிட்ட அனைவருக்கும் தானியங்களால் செய்யப்பட்ட தானியக்கொத்து பரிசாக அளிக்கப்பட்டது.

பிரம்மாண்ட அடிக்கல்:

விழாவுக்கு தமிழக அரசின் துணை முதல்வா் ஓ. பன்னீா்செல்வம் தலைமை வகித்தாா். முதல்வா் எடப்பாடி கே. பழனிசாமி அடிக்கல் நாட்டி வைத்து பொக்லைன் இயந்திரங்களின் பணிகளைத் தொடங்கி வைத்தாா்.

அயோத்தியில் ராமா் கோயில் கட்டுமானப் பணிக்கு அண்மையில் பிரதமா் மோடி அடிக்கல் நாட்டியபோது நடத்தப்பட்ட நிகழ்ச்சியைப்போல அடிக்கல் நாட்டுவதற்கென பிரத்யேக ஏற்பாடுகள் செய்யப்பட்டிருந்தன.

எங்களுடைய இணையதள செய்திகளை உடனுக்குடன் தெரிந்து கொள்ள எங்களுடைய சமூக இணையப்பக்கத்தை Like, Follow, Joint மற்றும் Subscribe செய்து கொள்ளுங்கள்...



Post a comment

0 Comments