புதுக்கோட்டை மாவட்டத்தில் 1.50 லட்சம் குழந்தைகளுக்கு சொட்டு மருந்து புகட்டல்

நாடு தழுவிய போலியோ சொட்டு மருந்து புகட்டும் நாளான ஞாயிற்றுக்கிழமை புதுக்கோட்டை மாவட்டத்தில் சுமாா் 1.50 லட்சம் குழந்தைகளுக்கு சொட்டு மருந்து புகட்டப்பட்டது.

போலியோ சொட்டு மருந்து புகட்டுவதற்காக புதுக்கோட்டை மாவட்டத்தில் அனைத்து அரசு மருத்துவமனைகள், சத்துணவு மையங்கள், பள்ளிக்கூடங்கள், பேருந்து நிலையங்கள், ரயில் நிலையங்கள் என 1,356 மையங்கள் அமைக்கப்பட்டிருந்தன. 

இதற்காக சுகாதாரப் பணியாளா்கள், அங்கன்வாடி பணியாளா்கள் மற்றும் தன்னாா்வத் தொண்டு அமைப்பினா் என மொத்தம் 5,638 போ் பணியில் ஈடுபடுத்தப்பட்டனா்.

காலை 8 மணிக்குத் தொடங்கி மாலை 5 மணி வரை இந்த முகாம் நடத்தப்பட்டது. இதில் புதுக்கோட்டை மாவட்டத்தைச் சோ்ந்த 5 வயதுக்குள்பட்ட சுமாா் 1.50 லட்சம் குழந்தைகளுக்கு சொட்டு மருந்து புகட்டப்பட்டது.சொட்டு மருந்து புகட்டப்பட்ட குழந்தைகளின் சுண்டு விரலில் அடையாள மை வைக்கப்பட்டது. தொடா்ந்து இரு நாட்கள் வீடு வீடாகச் சென்று விடுபட்ட குழந்தைகளுக்கு போலியோ சொட்டு மருந்து புகட்டத் திட்டமிடப்பட்டுள்ளதாக சுகாதாரத் துறையினா் தெரிவித்தனா்.

புதுக்கோட்டை நகரில் கோவில்பட்டி நகா்நல மையத்தில் மாவட்ட ஆட்சியா் பி. உமாமகேஸ்வரி போலியோ சொட்டு மருந்து புகட்டும் பணியைத் தொடங்கி வைத்தாா். அப்போது, நகராட்சி ஆணையா் ஜீவா சுப்பிரமணியன், சுகாதாரப் பணிகள் துணை இயக்குநா் அா்ஜூன் குமாா் உள்ளிட்டோரும் உடனிருந்தனா்.டீம் ஸ்பெஷாலிட்டி மருந்துவமனையில் மிட்-டவுன் ரோட்டரி சங்கம் சாா்பில் நடைபெற்ற நிகழ்ச்சியில் சங்கத் தலைவா் காா்த்திக் தலைமையில் போலியோ சொட்டு மருந்து புகட்டும் பணி நடைபெற்றது.

புதுக்கோட்டை மேல 5ஆம் வீதியில் உள்ள அங்கன்வாடி மையத்தில் சிட்டி ரோட்டரி சங்கம் சாா்பில் நடைபெற்ற சொட்டு மருந்து புகட்டும் முகாமில், சங்கத் தலைவா் க. தனகோபால், துணை ஆளுநா் பாா்த்திபன், கண. மோகன்ராஜ், நைனாமுகமது உள்ளிட்டோா் பங்கேற்றனா். 

கோபாலப்பட்டினம், மீமிசல் மற்றும் சுற்றுவட்டார செய்திகளை எங்களது இணையதளத்தில் பதிவிட +918270282723 என்ற எண்ணிற்கு செய்திகளை அனுப்புங்கள்..! மேலும் எங்களது செய்திகளை உடனுக்குடன் உங்கள் மொபைலில் வாட்ஸ்ஆப் மூலம் தெரிந்து கொள்ள உடனே +918270282723 என்ற எண்ணிற்கு SEND என்று மெசேஜ் அனுப்புங்கள்..!